ഒരു പൂവിന്റെ യാചന

അടരാൻ വൈകിയ പൂവിനോട്

സന്ധ്യ വന്നു ചോദിച്ചു

“ഇന്നെന്തേ ഒരു മടി ?”

ഗദ്ഗദ൦ പൂണ്ട് പൂവ് ചൊല്ലി

“മടിയല്ല ,പെണ്ണേ കൊതിയാണ്,

കുറച്ചു നേര൦ കൂടി 

ജീവിച്ചിരിക്കാനൊരു കൊതി".

"സൂര്യനെക്കാണാഞ്ഞ് രാവിലെ

വിടരാൻ‌ ഞാനൊന്ന് വൈകി

യൗവ്വനമെന്റെ വിരിഞ്ഞു വന്നപ്പോൾ

സൂര്യ തേജസ്സെന്നെ വാട്ടി

സുഗന്ധ൦  ഞാൻ വീശു൦ മുമ്പേ

ഒരു കാറ്റ് വന്നൊന്നാട്ടി

പിന്നൊരു പേമാരി വന്നടിച്ചു

എന്റിതളുകളാകെ വലിഞ്ഞു".

"വന്നില്ലയാരുമിനിയു൦ തേടിയെന്നെ.

വരാതിരിക്കില്ല  ആരേലു൦

നിർമ്മാല്യ മാലയ്ക്ക് പൂ പറിക്കാനായ്.

കാത്ത് നില്പൂ ഞാനെന്റെ

ജന്മസാഫല്യത്തിനായ്.

ഒരല്പ നേരം  കൂടി ഞാനീ

ഞെട്ടിൽ ജീവിച്ചിരുന്നോട്ടേ “....

കേണൽ രമേശ് രാമകൃഷ്ണൻ

27 Mar 2020