ആൾക്കൂട്ടത്തിൽ ഞാൻ

ചിലരുണ്ട് മണ്ണിൽ

ഭൂമിയെ‌ താങ്ങി നിർത്തുന്നവർ

അവരുടെ കയ്യൊന്നു മാറിയാൽ

ഭൂമി മറിഞ്ഞു പോകുമെന്ന് പേടിക്കുന്നവർ.

മറ്റു ചിലരോ, ഭൂമിക്ക് ഭാരമായവർ

ഒന്ന് ചത്ത് കിട്ടാനായ് എല്ലാരും കാത്തിരിക്കുന്നവർ.

ആർക്കും വേണ്ടാത്തവർ ഏറെയുണ്ടെന്നാലു൦

ആരുമില്ലാത്തോരാണധികവു൦.

ആരെങ്കിലും കാണുമെന്നാശിക്കുന്നോരുണ്ട്.

ആരാ ? എന്നതിനുത്തരമില്ലാത്തോരുമുണ്ട്.

തലമുറകളുടെ കണക്കു പുസ്തകം

കയ്യിലുള്ളോരുണ്ട്.

തന്തയാരെന്ന് ചോദിച്ചാൽ

അറിയില്ലാത്തോരുമുണ്ട്.

ഒരുപാട് മുഖമുള്ളവരുണ്ട്

ഒരു മുഖ൦ പോലു൦ ഇല്ലാത്തവരുമുണ്ട്.

ഇവരുടെയെല്ലാ൦ ഇടയിൽ

ഒരു ചെറിയ മനുഷ്യനായി ഞാനുമുണ്ട്....

കേണൽ രമേശ് രാമകൃഷ്ണൻ

15 July 2020