ഇരട്ടത്താപ്പ്

നാൽപ്പാമരമിട്ട വെള്ളം

തലയിലുടെ ഒഴിച്ചു,

താമരക്കുളത്തിൽ മുങ്ങിക്കുളിച്ചു,

സോപ്പുകൾ ഓരോന്നായി 

മാറി മാറി തേച്ചു

കറ്റാർവാഴ ജെല്ലി 

വെളിച്ചെണ്ണയിൽ ചാലിച്ച്

ദേഹമാസകലം തേച്ചു പിടിപ്പിച്ചു,

ഫെയർ ആൻഡ് ലവ്ലിയും ചുണ്ണാമ്പും സമാസമം ചേർത്ത് പുരട്ടി,

വെയിലത്ത് നടക്കാതെ 

തണലത്ത് നടന്നു,

മഷിക്കറുപ്പിൽ നീല ചാലിച്ച

എന്റെ നിറമൊട്ടും മാറിയില്ല.

കാർമുകിൽ വർണ്ണനെന്ന്

ആരും എന്നെ വിളിച്ചതുമില്ല.

“ ഇരുട്ടത്ത് നില്ക്കരുതേ”എന്നു മാത്രം

എല്ലാരും എന്നെ ഉപദേശിച്ചു.

കൃഷ്ണന്റെ നിറമോ വന്ദനീയം!

എന്റെ നിറമെന്തേ നിന്ദനീയം ??

കേണൽ രമേശ് രാമകൃഷ്ണൻ

16 Mar 2021