വരൂ നമുക്ക് കളിക്കാം.

സഖീ,

നമുക്ക്  ആ മാഞ്ചുവട്ടിൾ

ഓലത്തുമ്പ് കൊണ്ട് ഒരു മാടമുണ്ടാക്കാം

അതിന്റെ ഉള്ളിൽ കവിള് മടൽ കൊണ്ടൊരു കട്ടിലുണ്ടാക്കാം

എന്നിട്ട് അച്ഛനും അമ്മയും കളിക്കാം

കണ്ണാം ചിരട്ടയുടെ പാത്രങ്ങളിൽ 

പച്ചിലകൾ നുറുക്കിയിട്ട്

ചോറും കറികളും വെയ്ക്കാം.

മുല്ല വള്ളിയിൽ തൂങ്ങി നമുക്ക്

ഊഞ്ഞാലാടി രസിക്കാം

പിന്നീട് കടലാസ് കപ്പലുണ്ടാക്കാം

അതിനെ പൂക്കൾ കൊണ്ട് നിറയ്ക്കാം

ഒരു കട്ടുറുമ്പിനെ കപ്പിത്താനാക്കാം

കിണറിന്റെ അരികിലെ ഒഴുക്കുചാലിലൂടെ

വിദേശത്തേക്ക് അയക്കാം

അങ്ങനെ ഒരുപാട് കാശുണ്ടാക്കാം

പീന്നീട് കുഞ്ഞുടുപ്പും പാവയും

ഒരു പന്തും ഒരു പീപ്പീയും

യഥേഷ്ടം നമുക്ക് വാങ്ങാം

കളികളെല്ലാം കഴിഞ്ഞ്

ഞാൻ കട്ടിലിലും

നീ തറയീലും കിടന്നുറങ്ങാം

നമുക്കിന്ന് വയസ്സായെങ്കിലെന്ത്?

നമ്മുടെ ബാല്യം

ഇനിയുമില്ലേ ബാക്കി…?

കേണൽ രമേശ് രാമകൃഷ്ണൻ

20 Nov 2020