മുളയ്ക്കാത്ത വിത്തുകൾ

കൊഴിയുന്ന മാമ്പൂക്കളോടൊപ്പം

അടർന്നു വീഴുന്ന 

കുഞ്ഞ് മാങ്ങകളെ നോക്കി

മനസ്സ് പിടഞ്ഞിട്ടുണ്ട്

മാവിനെ പഴിച്ചില്ലെങ്കിലും

കുലുക്കിയ കാറ്റിനെയും

ആഞ്ഞടിച്ച പേമാരിയെയും

ശപിച്ചിട്ടുണ്ട്.

ഈ ഉണ്ണി മാങ്ങകൾ എല്ലാം

വലുതായിരുന്നെങ്കിൽ എന്നാശിച്ചിട്ടുണ്ട്.

പിന്നീട് ഞാൻ ചിന്തിച്ചു.

മാവിൽ വിരിഞ്ഞ പൂക്കളെല്ലാം

മാങ്ങയായ് മാറിയെങ്കിൽ

ആ മാങ്ങകളുടെ അണ്ടികൾ മുളച്ച് മാവുകൾ ആയെങ്കിൽ

അവയിലെ എല്ലാ പൂക്കളും വീണ്ടും മാങ്ങകളും മാവുകളും ആയെങ്കിൽ

എല്ലായിടത്തും മാവുകൾ മാത്രം കണ്ടേനെ.

അങ്ങനെ തന്നെ പ്ലാവും ചക്കയും ചക്കക്കുരുവും

വീണ്ടും പ്ലാവും ചക്കയും ചക്കക്കുരുവും

ലോകം മുഴുവനും മാവും പ്ലാവും മാത്രം

വേറെ ഒന്നിനും സ്ഥലമില്ലാതെ.

പ്രകൃതിയാണ് ശരി, 

ദൈവവും.

എല്ലാം വിത്തുകളും മുളയ്ക്കരുത്..

കേണൽ രമേശ് രാമകൃഷ്ണൻ

05 Apr 2021