ഇലകൾ

കുഞ്ഞായിരിക്കുമ്പോൾ

എല്ലാരും പുകഴ്ത്തി

എന്തു സൗന്ദര്യം, എന്തൊരാരോഗ്യം !

യൗവനത്തിലും പറഞ്ഞു

" നീയാണ് ഞങ്ങളുടെ ദൈവം,

ഞങ്ങടെ ജീവൻ  നില നിർത്തുന്നവൻ"

ഞാൻ പുളകിതനായി

മേലാകെ കോരിത്തരിച്ചു.

വായുവിൽ നിന്നും

ഉച്ഛശ്വാസങ്ങളെല്ലാം ഞാൻ വലിച്ചെടുത്തു

എന്റെ ഉള്ളിലിട്ട് അതിനെ വൃത്തിയാക്കി

ശ്വാസ വായു ഞാൻ പുറത്തേക്ക് വിട്ടു.

അതും വലിച്ചു കൊണ്ട്

ചിലർ മരങ്ങൾ വെട്ടി വൃത്തിയാക്കി

ചിലർ കണ്ടില്ലെന്ന് നടിച്ചു

മറ്റ് ചിലർ തിരിഞ്ഞ് നോക്കാതെ പോയി

ശ്വാസ വായുവിനായി എല്ലാരും

ദൈവത്തിന് സ്തുതി പാടി...

കാലം കഴിഞ്ഞു

ഞാൻ വയസ്സായി

പഴുത്ത്, ഉണങ്ങി, താഴെ വീണു

ആരോ അധികാരി പറയുന്നത് കേട്ടു

" നാശം, ഇവിടെ എല്ലാം വൃത്തികേടാക്കി.

വാരിക്കളയെടോ, ഉണങ്ങിയ ഇലകളെ.

ചുട്ട് ചാമ്പലാക്കൂ,

അല്ലെങ്കിൽ കുഴിച്ച് മൂടൂ,

മണ്ണിനെങ്കിലും വളമാകട്ടെ".

ഇന്ന് തെരുവിൽ

നീതിയ്ക്കായി കരയുന്ന

കർഷകരും ഒരുതരം

ഇലകൾ തന്നെയല്ലേ......?

കേണൽ രമേശ് രാമകൃഷ്ണൻ

13 Dec 2020