മതിലുകൾ

മതിലുകളുടെ  ഇപ്പുറമിരുന്ന്

ഞാൻ പണിത സൗധങ്ങൾ

ഞാൻ മാത്രമേ കണ്ടുള്ളൂ.

മതിലുകളുടെ അപ്പുറമിരുന്ന്

അവർ ചെയ്ത കൃത്യങ്ങൾ

ഞാനൊന്നും കണ്ടില്ല.

അറിവിന്റെ , അഴകിന്റെ,

കഴിവിന്റെ, കരുത്തിന്റെ,

നിറത്തിന്റെ, ഗുണത്തിന്റെ

ജാതി, മത, വിശ്വാസത്തിന്റെ,

ഭാഷയുടെ, ഭാഗ്യത്തിന്റെ,

തത്വ സംഹിതകളുടെ,

രാഷ്ട്രീയത്തിന്റെ 

പടുകൂറ്റൻ മതിലുകൾ

ആരാണ് ഇടയ്ക്ക് കെട്ടിയത് ?

വരൂ എൻ സഖാക്കളേ,

നിങ്ങളുടെ ചുറ്റിക കൂടെ എടുത്തോളൂ,

അടിച്ചുടയ്ക്കാം നമുക്കീ മതിലുകൾ,

ഒരു വശത്തു നിന്നും, ഓരോന്നായി.

ഒത്തു പിടിച്ചാൽ മല മാത്രമല്ല ,

മതിലും പോരുമെന്നാക്കീടാം......

കേണൽ രമേശ് രാമകൃഷ്ണൻ

3 Jun 2022