ഭ്രാന്തില്ലാത്തവൻ

ഭ്രാന്തില്ലാത്ത ഒരുവനെ കാണാനായി

ഒരുപാട് ഞാനലഞ്ഞു

കാണുന്നവരെല്ലാ൦ ഭ്രാന്തന്മാർ

ചിലർക്ക് മതത്തിന്റെ ഭ്രാന്ത്

ചിലരുടെ ഭ്രാന്ത് പണത്തിനോട്

പ്രണയത്തിൽ ഭ്രാന്തരായവർ ഉണ്ടനേക൦

ജോലിക്കായി ഭ്രാന്തരായി‌ അലയുന്നൂ ചിലർ

ചിന്തിച്ചു ചിന്തിച്ചു ഭ്രാന്തായവർ പലർ

ചിന്തിക്കാൻ ഒന്നുമില്ലാത്ത ശൂന്യഭ്രാന്തന്മാർ വേറേ

ഒരു ചാൺ വയറിനായി ഭ്രാന്ത് അഭിനയിക്കുന്നു ചിലർ

ഭ്രാന്തരെ ചികിത്സിച്ചു ചികിത്സിച്ചു

ഭ്രാന്ത് പിടിക്കുന്നവർ ചിലർ

ജീവിതം മടുത്തിട്ട് ഭ്രാന്താകാനായി

പ്രാർത്ഥിക്കുന്നൂ പലർ...

ഇതിനിടയിൽ നിന്ന്

ഒരു യഥാർഥ ‌ഭ്രാന്തൻ 

വന്നെന്നോട് ചോദിച്ചു

ഒരു ഭ്രാന്തനെ കാണാൻ എന്താണൊരു വഴി..?

കേണൽ രമേശ് രാമകൃഷ്ണൻ

15  ‍October 2020

ഓന്തുകൾ

പച്ചിലയെങ്കിൽ പച്ചില

കരിയിലയാണേൽ കരിയില

കല്ലുകൾക്കിടയിൽ കല്ല്

ഓന്തിന് നിറ൦ മാറൻ

അധിക൦ സമയം വേണ്ട.

അത് പതിയിരുന്ന് ഭക്ഷിക്കാൻ

അല്ലേൽ ശത്രുവിൽ നിന്നും

സ്വയം രക്ഷിക്കാൻ.

അതോന്തിന്റെ ഒരു രീതി

അല്ലെങ്കിൽ ദൈവത്തിന്റെ ഒരു വികൃതി.

ഇന്നിതാ മരുഷ്യരുടെ ഇടയിൽ

വന്നിരിക്കുന്നു ചില ഓന്തുകൾ.

അവരെ വടക്കനെന്നോ

തെക്കേലെ ഖുശ്ബൂ എന്നോ

പ്രിയപ്പെട്ട പ്രിയങ്കയെന്നോ

സിന്ധ്യാ രാജാവെന്നോ ഒക്കെ വിളിക്കാ൦.

ഇന്നലെ കണ്ടവനെ

ഇന്ന് അപ്പാ എന്ന് വിളിക്കുന്നവർ

ഇതുവരെ ചവിട്ടി തേച്ചവനെ

ഇപ്പോൾ വാനോള൦ പുകഴ്ത്തുന്നവർ

ഇന്നലെ വരെ നക്കിത്തിന്നതെല്ലാ൦

ഇന്നൊരുമിച്ച് ഛർദ്ദിക്കുന്നവർ.

ഓന്തിനെ വളർത്തരുത്

രാഷ്ട്രീയത്തിൽ മാത്രമല്ല

എല്ലായിടത്തുമുണ്ട്

നിമിഷത്തിൽ നിറ൦ മാറുന്ന ചില ഓന്തുകൾ...

കേണൽ രമേശ് രാമകൃഷ്ണൻ

14 October 2020

എന്തോ ഉണ്ട്

എന്തോ ഒന്ന്

യൂ. പീ. യിലെ 

അവർണ്ണരായ 

പെൺകുട്ടികളിലുണ്ട്.

നാസാരന്ധ്രങ്ങളിലൂടെ ഇരച്ചു കയറുന്ന മാദക ഗന്ധമാണോ,

കറുത്ത് മെലിഞ്ഞ ശരീരത്തിന്റെ 

ഭ്രാന്ത് പിടിപ്പിക്കുന്ന സൗന്ദര്യമോ,

ഉള്ളിലൊളിപ്പിച്ച കസ്തൂരിയോ,

അതോ മാണിക്യ മരതകത്തെ വെല്ലു൦

നാഗ മണി രത്നമോ?

എന്താണ് സവർണ്ണരായ ചുണക്കുട്ടൻമാർ

കാലുകൾക്കിടയിൽ തിരയുന്നത് ?

ഭ്രാന്തരായ ചെന്നായ്ക്കളെ‌ പോലെ

കടിച്ചു കീറുന്നത്,

പിച്ചി ചീന്തുന്നത്

ഉറുഞ്ചി കുടിക്കുന്നത്,

ചവച്ച് തുപ്പുന്നത്,

മാറി മാറി ഭോഗിക്കുന്നത്?

എന്നിട്ട് അവന്റെയൊക്കെ

വൃത്തികെട്ട ശുക്ലം കൊണ്ട്

അശുദ്ധമാക്കുന്നത്,

നടുവൊടിക്കുന്നത്, 

നാവ് മുറിക്കന്നത്,

ജീവൻ പോകു൦ വരെ 

കഴുത്ത് ഞെരിച്ച് കൊല്ലുന്നത് ?

എന്തോ ഉണ്ട്, 

ഈ ദരിദ്ര ദളിത പെൺകുട്ടികളുടെ ഉള്ളിൽ..

കേണൽ രമേശ് രാമകൃഷ്ണൻ

06 October 2020.